شمارات_ بابكر سلك يكتب ..صواميل البلد مرخية

*البلد دي طبعاً مربطة مع بعضها بصواميل

*مايقوم وجدي يسمعنا يقوم يحلحل ماتبقى منها مربوطاً ممسكاً بمفاصل البلد

*أصلو البلد زي أبراج كشافة الاستاد

*قطع حديدية تجمع مع بعضها

*يربطوها بصواميل

*يقرضوها صامولة صامولة

*تبقى برج يحمل إضاءة

*كشافة تكشف لينا قبل تكشف حالنا

*المهم

*سكك حديد وسودانير وصمغ عربي ومشروع جزيرة وتصدير قطن

*كلها كانت تشكل كشافتنا ربطوها الانجليز ببعضها صامولة صامولة وقرضوها بالمفتاح

*المفتاح الانجليزي البنعرفو كلنا ده

*مفتاح ميزتو قوي وبديك مقاس حسب مقاس صامولتك وبقعد مئات السنين

*مفتاح بحل ويربط بمنهجية ومهنية عالية

*وبعد داك

*في ستة وخمسين

*غيرنا المفتاح

*غيرنا المفتاح الانجليزي بمفتاح سوداني

*بوظ لينا بعض تربيعات صواميل البلد

*ماكان زي المفتاح الانجليزي

*غيرنا المفتاح بمفتاح موديل عبود ٥٩

*بقولوا جابو لينا عبدالله

*المفتاح موديل عبود يفك ومرات يحلج

*رجعنا للمفتاح موديل الديمقراطي

*بوظ من صواميل البلد ألف صامولة في خمسة سنين

*خليناهوا وجابوا لينا مفتاح موديل أب عاج ٦٩

*ده كمان ماكان مفتاح

*كان أجنة وشاكوش

*تربيعة في راس صامولة يمسك فيها مفتاح ماخلاها

*رجعنا لشنطة الديمقراطي المليانة مفاتيح تايوانية.

*تنكسر مع أول صامولة وتعمل رايحة

*وجابوا لينا المفاتيح الصينية

*طقوم

*مفاتيح تسعين في المية منها مواسير

*وفي شواكيش لتكسير وتحطيم أغلى صواميل البلد

*ومرزبة كانت مستخدمة لتفتيت الصواميل الجماعي

*وبيوت تصهر فيها أجود صواميل البلد ليلاً

*ليتم استبدالها بصواميل صينية طبخ ساااي

*المفاتيح الصينية

*خربت صواميل البلد

*اشتغلت ليك في برج البلد دي تربيط وتزبيط لما البرج لحق برج الهلال الشمالي الغربي وطفا

*رجعنا تاني لشنطة الديمقراطي للمفاتيح

*المرة دي فيها مفاتيح جيدة لكن بسيطة

*وباقي الشنطة صامولة عجلة مايفكها

*البلد صواميلها ملخلخة

*وفي صواميل رابطة غلط لليوم في حتات مابتقدر عليها

*المفتاح حمدوك ماركة عالمية

*وفي مفتاح عبد الفتاح

*غلبتو صواميل الصدا القديمة

*فهل يستطيع المفتاح حمدوك علاج مفاتيح الوطن

*أم نسعى للمفتاح الانجليزي من جديد؟؟؟؟

*أها

*نجي لي شمارات والي الخرتوم

*كان شفت يا والينا

*زمان في سوق الرابعة في مكنيكي اسمو قطية زبوناً لينا

*تودي ليهو العربية فيها لستك بدفق زيت الفرملة علينا

*يجيب مسمار يقفلوا ويلغيهو يا والينا

*تودي ليهو العربية فيها وصلة هواء مخرومة زايدة الصرف علينا

*يجيب عود يحشرو ويقفلها لينا

*بلغي بس ومابصلح أصلو يا والينا

شمارات الكلب

ننساك كيف والكلب قال بالطريقة دي ماتستبعدوا وزير الكهربا لو ردم سد مروي ولغاهو… الغيهو ياقطية

وإلى لقاء.

سلك